Kategoria: Tropela Podcastak

Tourra lehiatzen ari diren txirrindulariek gaur izan dute lehen atseden eguna. Atseden egun hau probestuz, Eneko Garate (@egarate), Iosu Garate (@iosugarate) eta Egoitz Lizasoz gain (@elizaso), gonbidatu berezi batek hartu du parte: David Etxebarriak (@davidetxebarria). Eskerrik asko Davidi gure gonbitea onartu izanagatik.

Lau solaskide hauek lehen asteko erorikoez, euskaldunez, faboritoez, hurrengo egunetan ikus dezakegunaz eta gertakari “ilunez” (atzokoan auto batek Flecha eta Hoogerland bota zituenekoa eta gaur jakin den Kolobneven ustezko positiboa) izan dituzte mintzagai. Eta noski, Tropelako lehen postuen inguruan ere aritu dira.

Podcast hau gustuko izan baduzu, hemen dituzu aurreko podcastak entzungai.

Jatorrizko edukira joan

Iosu Garate (@iosugarate) eta Egoitz Lizasok (@elizaso) 9. etaparen kronika egiten du podcast honetan. Etapa honetan eroriko bat izan da tropel nagusian eta Vinokourov eta Van den Broeckek besteak beste etxerako bidea hartu behar izan dute. Tropelean geldialdia izan da hori dela eta, eta hori probestuz, iheslariek tartea ateratzeari ekin diote. Baina larriena jazo zela uste genuenean, auto batek Flecha eta Hoogerland errepidetik kanpora bidali ditu bideoan ikusten duzuen bezala.

Amets Txurrukak ere erorikoa izan du etapa hasieran eta etxerako bidea hartu beharrean aurkitu da ustez lepauztaia hautsita. Hemendik gure animorik handiena Amets!!

Etapa garaipena Luis Leon Sanchezek eraman du gaurkoan eta lider berria Voeckler da.

Aurreko podcastak hemen dituzu.

Jatorrizko edukira joan

Rui Costa Movistar taldeko portugaldarrak irabazi du Super-Besse Sancyko gainean bukatutako etapa. Erdialdeko mendiguneak etapa ikusgarriak eman ohi ditu urtero eta halakoxea izan da gaurkoa. Seigarren kilometroan eraturiko ihesalditik biziraun duen bakarra izan da Rui Costa. 12 segundora iritsi da Gilbert, eta 15 segundora faborito gehienak, Gesink izan ezik.

Vinokourovek debuta egin zuen Tourrean 1999an, Casino taldearekin. Denboraldi bikaina eginda iritsi zen Tourrera, baina gorriak ikusi zituen gazteak, bereziki Galibierren etapan, Sestrierera bidean. Rui Costa txirrindularitza gustuko zuen 13 urteko nerabea baino ez zen orduan. Gaur bien bideak gurutzatu egin dira. Orpoz orpo ibili dira azken metroetan. Bata, portugaldarra, ihesaldia azken bururaino eraman nahian, ito larrian, eta kazahastandar beteranoa hura harrapatu eta bide batez mailot horia Hushvodi kentzeko asmoz. Eta portugaldarra nagusitu da. Vinokourov, ordea, tropelak irentsi du azken maldan. Dena dela, Vino-k beste lezio bat egin du. Enegarrena. Etekinik ez du lortu, baina gaur erakutsitako kemenak lagunduta bete du garaipenen zorroa urtez urte.

Eguneko ihesaldia helmugatik 25 kilometro ingurura sakabanatu da, bigarren mailako mendatean alegia. Van Garderenek, Rui Costak, Riblonek eta Gautierrek egin dute aurrera. Haiekin abiatutako Xabier Zandio atzean gelditu da aldapa horretan. Tropelean ere mugimendua izan da. Astanako Tiralongok jo du aurrena, Amets Txurrukak eta Flechak ondoren. Gauzak horrela, Vinokouroven astindua iritsi da. Adoretsu joan da, eta 40 segundoko tartea ireki du; mailot horia janzteko lain. Tiralongo taldekideak barrena hustu egin du Vinoren mesedetan bat egin dutenean.

Azken aldapako magalera, Super Besse Sancyko magalera, heldu bezain laster aldatu du erritmoa Rui Costak eta Van Garderen saiatu da hura harrapatzen; ez du, ordea, lortu. Vinokourovek, bere aldetik, gutxika gutxika, ihesaldiko kide guztiak aurreratu ditu, baina ezin izan du Rui Costa kate motzean lotu. Tropela ere gain gainean zetorren. Contador bera, Evans eta Cunego ahalegindu dira, baina azkenean Gilbertek utzi ditu gainerakoak atzean azken malda tentean. Haatik, ez da nahikoa izan Movistarreko portugaldarra atzemateko. Faborito gehienak elkarrekin iritsi dira, baina talde horretan ez zen Gesink. Holandarra erori egin zen duela egun gutxi eta gorputz osoan mina duela aitortu du helmugaratu bezain laster. Minutu eta erdira iritsi da Rabobankeko taldeburua. Lasterketaren ikuskizunaren mesedetan espero dezagun Pirinioetara bidean osatzea. Hushvodek eutsi dio lehen postuari eta Evansek eta Franck Schleckek jarraitzen dute bigarren eta hirugarren, hurrenez hurren.

Beharbada, Unzuek, Movistarreko zuzendariak pentsatuko zuen aurtengo denboraldia transiziokoa izango zela nolabait, euren liderra, Valverde, urtarrilean itzuliko baita lehiara zigorra beteta. Bada justu kontrakoa gertatzen ari da. Txarretik asko izaten ari da denboraldia. Zakurra izaten ari da benetan; Tondoren heriotzaren arrastoa ez da sekula ezabatuko eta Soler kolonbiarraren eroriko larria ezin aipatu gabe utzi, noski. Baina onetik ere izaten ari da 2011. Euskal Herriko Itzulian etapa, Giroan bi eta Tourrean lehenengo astean poltsikoratu dute jada garaipena. Beñat Intxausti galdu dute, hori bai, ukondoa hautsita baitu; laster errepidean ikusiko ahal dugu!

Bukatu aurretik, pare bat apuntetxo:
Haimar Zubeldia euskal ziklisten artean onena da sailkapen nagusian eta RadioShackeko bigarren txirrindularia da; Kloden du aurretik eta Leipheimer atzetik. Askatasuna emango al dio Bruynel zuzendariak Pirinioetan?

Velits esloveniar gaztea lehen hamarren artean dago. Ikasteko ari omen da Tourrean parte hartzen, eta Martin da taldeko liderra. Esanak esan, nik Pirinioetan ikusteko gogoa dut. Ez ahaztu iazko Espainiako Vueltan hirugarren bukatu zuela. Aurrekoan Piban adiskidea aurtengo Tourreko ezusteez galdezka zebilen. Ba, erne Velitsekin. Egoitz Lizaso lagunak horixe bera usaintzen duela esan du Twitterren.

Argazkia: Sirotti / cyclingnews

Podcasta

Axier Sukia eta Egoitz Lizasok (@elizaso) grabatu dute podcast hau 8. etaparen inguruan.

Aurreko podcastak hemen dituzu.

Jatorrizko edukira joan

Egoitz Lizasok (@elizaso) 7. etaparen kronika egiten du podcast honetan. Atzokoan Sky taldeak lan bikaina azpimarratzen bagenuen ere Boasson Hagenen garaipena ahalbideratzen, gaurkoan gerta zekiokeen gauzarik okerrena gertatu zaio: Wigginsek eroriko baten ondorioz min hartu eta lasterketa utzi beharrean aurkitu da. Gaurko esprintean garaipena Cavendishek lortu du Petacchi eta Greipelen aurretik. Euskaldunen artean Pablo Urtasun ihesaldian sartu izana azpimarratzen dugu.

Aurreko podcastak hemen dituzu.

Jatorrizko edukira joan

Eneko Garate (@egarate) eta Egoitz Lizasok (@elizaso) 6. etaparen kronika egiten dute podcast honetan. Sky taldearen lan bikaina azpimarratzen da Boasson Hagenen garaipenean ondo aritu baita. Izan ere etapa hau esprinter indartsuentzat zen (Goss, Hushovd,..) eta ez Cavendish edo Farrar bezalakoentzat. Euskaldunen artean Gorka Izagirre aipatzen dute. Tropelako sailkapenari ere errepasoa egiten diote.

Jatorrizko edukira joan

Gaurkoan bai, gaurkoa Cavendish gailendu da esprintean. HTCek ondo bideratu du esprinta azken kilometroan sartu arte, baina gero anabasa sortu da tropelari tiratzeari utzi diotenean. Orduan Boasson Hagenen saiakera izan da eta beste batzuk ere sartu dira. Taldekiderik gabe, ordea, Cavendish bakarrik guztiei gailendu zaie.

Erorikoek protagonismo handia hartu dute. Sailkapen nagusiaren lehian aritzekotan dabiltzan zenbait txirrindulari erori dira, baina kaltetuena Brajkovic izan da. Esloveniarra anbulantzian eraman behar izan dute ospitalera eta lasterketa utzi beharrean aurkitu da. Ez du zorte hoberik izan Iban Velascok eta honek ere lasterketari agur esan behar izan dio.

Podcasta

Hemen duzue etapa amaitu ondoren Eneko Garate (@egarate), Iosu Garate (@iosugarate) eta Egoitz Lizasok (@elizaso) grabatutako podcasta entzungai, nabigatzailean bertan edo bestela iTunes bidez nahiz MP3 formatuan deskargatu dezakezue geziari klik eginez.

Jatorrizko edukira joan

Evansek irabazi du Tourreko laugarren etapa, Lorient eta Mur de Bretagne artekoa. Hirugarren mailako aldapa batean jarritako helmugan australiarrak Contadorri hartu dio aurrea. Denbora berean sartu dira Vinokourov, Uran, Gilbert, Hushvod liderra, Franck Schleck, Samuel Sanchez, Van den Broek eta Kloden.

Lehen egunetako eguzkiaren arrastorik ez da izan gaurko etapan. Mahuka luzeak eta zirak ikusi ditugu gaur. Bost lagunek hartu dute eguneko ihesaldia; Roy, Kadri eta Hoogerlandekin batera, bi euskal ziklistek egin dute aurrera: Erviti iruindarrak eta Izagirre ormaiztegiarrak. Bidea egin dute, eta tropelak bost kilometroren faltan harrapatu ditu. Ez dira, beraz, balentriatik urrutiegi ibili.

Helmuga hirugarrren mailako mendate batean jarria zuten antolatzaileek –akaso konturatu dira hamar etapa lau-lauak errenkadan jartzea gehiegizkoa dela-. Aldapa motza gaurkoa, baina gogorra. Cavendishek, Farrarrek edo Cancellarak amore eman dute igotzen hasi aurretik. Contadorrek jo du eta haren erasoa sakabanatu du tropela; aurretik, espainiarrarekin batera bederatzi ziklista geratu dira, eta haien arteko dema izan da etapa garaipenerako. Evansek jo du azken metroetan. Eta Contadorrek, enbidoari ordago. Espainiarrak, ordea, beranduegi egin du aurrera, eta gutxigatik izan bada ere, Evansek eskuratu du etapa. Hamarreko taldetxoa eta haien atzetik zetozenen artean zortzi segundo izan dira.

Lerrook idazten ari denak aipatu izan du plaza honetan bertan ez duela uste Evansek Tourra irabazi dezakeenik. Adinagatik, batik bat. Alegia, gazteagoak direnak, bereziki Schleck eta Contador freskoago iritsiko direla azken etapetara. Iritzi horri eusten diot, baina horrek ez du esan nahi australiarra begitan hartu dudanik, inondik ere. Txirrindulari bikaina da, eta Tourra irabazi ala ez, garaipen zerrenda polita eta oparoa osatzen ari da. Bejondeiola. Etapa irabazi izanaren lasaitasunak bere alde joka dezake lasterketa bukaera bitartean.

Asteazken, ostegun eta ostiraleko etapetan esprinterrak nagusituko dira, ezusteko handirik ezean. Alegia, tropelari kukuak oker jotzen ez badio eta ihesaldiak bere asmoa azken bururaino eramaten ez badu. Oilarren arteko hurrengo zita larunbatean izan daiteke, Super Besse Sancy hirugarren mailako mendatetxoan amaituko den etapan. Erne asteburuko menuari igandeko ibilbidea ere oso gorabeheratsua baita.

Larunbata arte, Hushvodek mailot horiari eutsiko diolakoan nago. Ados?

Argazkia: Sirotti / cyclingnews

Podcasta

Hemen duzue etapa amaitu ondoren Eneko Garate (@egarate) eta Egoitz Lizasok (@elizaso) e grabatutako podcasta entzungai, nabigatzailean bertan edo bestela iTunes bidez nahiz MP3 formatuan deskargatu dezakezue geziari klik eginez.

Jatorrizko edukira joan

Irrikaz geunden tropela.eus zaleok Tourreko lehen esprinterako. HTC-k gidatutako Cavendish britainiarra zegoen guztion kinielatan garaipenerako baina Farrar estatubatuarrak lortu du azkenean eskuak zerurantz begira jartzea. Eta nola ez, Italiako Giroan zendu zen bere lagun min Weylandt-i eskaini dio “W” zeinuaren bidez.

Azken 2 km-tan nahastu da lasterketa. Hondo, Thomas eta azken bihurguneak erorketa/mozketa bat eragin dute Garmin-Cervelo taldearen mesedetan. Hushovd maillot horiak eta Dean-ek egindako lana ezin hobeto bukatu du estatubatuarrak. Feillu eta Rojas izan dira hurrengo bi postuetan, gertu baina ez nahiko.

Ikusi beharko da hurrengo esprintetan Cavendish-en taldeak nola erantzuten duen azken kilometro horietan, baita Greipel zein Petacchi ere borrokan sartzeko gai diren ere.

Argazkia: Cyclingnews.com

Podcasta

Hemen duzue etapa amaitu ondoren Eneko Garate (@egarate), Egoitz Lizasok (@elizaso) eta Iosu Garatek (@iosugarate) grabatutako podcasta entzungai, nabigatzailean bertan edo bestela iTunes bidez nahiz MP3 formatuan deskargatu dezakezue geziari klik eginez.

Jatorrizko edukira joan

Sorpresa handirik ez dugu izan etapa honetan, nahiz eta agian distantzia hain laburra izateak aldeak ere oso txikiak izatea ekarri. Garmin-Cervelo taldea nagusitu da etapan eta Hushovd jantzi da horiz etapa amaieran. Ortzadar maillota gustura kentzen da soinetik Tourreko maillot horiaz ordezkatzeko bada.

10 segundoren barruan beste 5 talde sailkatu dira irabazleaz gain: BMC, Sky, Leopard-Trek, HTC-Highroad eta Radioshack. Talde amerikarrak ekarri duen hautagai armadaz gain, etapa honen ondoren hobetuen kokatuak irten direnak Evans, eta Schleck anaiak izan dira, Wiggins ahaztu gabe. Hautagaien taldeen artean bigarren koska batean, Gesink-en Rabobank eta Contador-en Saxo Bank iritsi dira. Galdu duten denbora, baina, ez da horrenbestekoa izan: 12 eta 28 segundo hurrenez hurren.

Galtzaileen artean, Basso-ren Liquigas eta Euskaltel-Euskadi aipatu behar. Italiarrek erlojuz kontrako txukunak egin ohi dituzte baina atzo ia minutua galdu zuten. Euskal taldea berriro ere azkenputz: 1 eta 22 segundu gehiago Samuel Sanchez-ek galdutakoak. Castroviejo, taldeko espezialista onena etxean utzi, eta batik bat prentsa eta kazetariengan pentsatuz, Arabar Errioxan egindako entrenamendu bat etapa honetan lan polit bat egiteko nahikoa zirela uste bazuten, atzokoak aurkakoa erakutsi zuen. Datu bat: aurtengo Giroan ere azkenengoak izan ziren laranjak erlojuaren kontrako taldekako saioan.

Podcasta

Hemen duzue etapa amaitu ondoren Egoitz Lizasok (@elizaso), Iosu Garatek (@iosugarate) eta Eneko Garatek (@egarate), grabatutako podcasta entzungai, nabigatzailean bertan edo bestela iTunes bidez nahiz MP3 formatuan deskargatu dezakezue geziari klik eginez.

Jatorrizko edukira joan

Gaurko etapa Gilbertek irabaziko zuela esaten genuen Tour honetako lehen podcastean eta hala gertatu da. Gaurkoa Gilberten emazteak urteak betetzen zituen eta opari ezin hobea zuen eskaintzeko.

Belgikako maillot berria soinean eta berari muxuak emanez helmugaratu da Gilbert. Cancellara saiatu da sorpresa ematen baina belgikarrak horrelako helmugaratzeetan gaindiezina dela erakutsi du berriro ere. Gainera gaurkoan saria laukoitza izan da berarentzat: etapa garaipenaz gain, liderraren maillot horia, erregulartasunaren berdea eta menduko puntu gorridun maillot zuria bereganatu ditu. Badaki biharko erlojuaren kontrako saioan liderrarena galdu egingo duela baina pozik egoteko moduan da Gilbert.

Ezustekoak ere izan dira gaurko etapan, baina horiek podcastean dituzue entzungai.

Argazkia: Bettini

Podcasta

Hemen duzue atzo etapa amaitu ondoren Iosu Garate (@iosugarate) eta Egoitz Lizasok (@elizaso) grabatutako podcasta entzungai, nabigatzailean bertan edo bestela iTunes bidez nahiz MP3 formatuan deskargatu dezakezue geziari klik eginez.

Jatorrizko edukira joan